Malamang kung lahat tayo ay may kapangyarihan na bumasa ng isip ng isang tao, baka magkaroon ng delubyo sa daigdig. Binigyan tayo ng Diyos ng isip at puso upang gamitin sa paraan na kailangan nating isipin at maramdaman ang mga bagay na nakakaapekto at makakatulong sa atin upang umunawa.
Walang sinuman ang kayang bumasa ng isip ng tao. Kung meron man (kahit nagpapanggap), may pangontra para diyan – ang ngiti.
Ngiti?
Hindi ba para sa mga masasayang tao lang ang ngiti?
Nagkakamali ka…
Mayroong limang klase ng ngiti na masusing pinag-aralan ni Clyde Kluchhohn sa kanyang artikulong “Mirror of Man” Ayon sa kanya, ito ay isang natural na kilos ng tao na nagpapakita nakatagong damdamin. Ayon sa kanya, iba’t-iba ang uri ng ngiti. Ito ay ang mga sumusunod: “Contrary Smile”, “Inner Smile”, “Ambigous Smile”, “Deceptive Smile” at “Platinum Smile”.
Contrary Smile
Paano ba ito?
Ito yung klase ng ngiti na taliwas sa kanyang tunay nararamdaman. Ngumungiti ang isang tao upang mawala ang lungkot o dalamhati na kanyang nararamdaman. Halimbawa, natalo ang kinakampihan mong Los Angeles Lakers sa Boston Celtics. Kahit masama na ang iyong loob dahil natalo ka sa pustahan, ngumungiti ka pa din. Iyon ay para ipakita mo sa iba na okay lang ang lahat… pero ang totoo, hindi.
Inner Smile
Ano naman ito?
Ito ang ngiti ng may kakuntentuhan sa isang tao o bagay. Ang ngiting ito ay kabaligtaran naman ng Contrary Smile. Ang ngiting ito ay nauukol sa tunay na nararamdaman ng isang tao – mabuti man o masama. Ito ang ngit na hindi nakikita ng mata. Ang ngiting ito ay nagmumula sa puso. Isang halimbawa na lang ay nakita mo na maligaya ang mga kaibigan mo sa kanilang natamong karangalan o kaya naman ay nakita mo ang kaaway mo na nadapa at ibinulong mo sa sarili mo na “buti nga sa ‘yo”. Kahit di ka ngumiti sa kanila, ramdam mo na sa kalooban mo ay masaya ka.
Ambigous Smile
Eh ano naman ang isang ito?
Ito ang pinagsamang Contrary at Inner Smile. Ang ngiting ito ay komplikado. Ang totoo niyan, ang ngiting ito ay taglay ng mga matatalino at magagaling sa isang larangan. In Layman’s term, “Plastic Smile.” Peke ang ngiting ito dahil walang tiyak na emosyon at sinseridad. Ito ang mahirap basahin. Halimbawa ay ang mga kumakandidato sa isang eleksyon. Iba’t iba ang ispekulasyon ng mga taong nginingitian niya kaya nahihirapan ang tao kung totoo o sincere ang taong nakikiusap na iboto. Sa maikling salita isa itong nakakalokong ngiti.
Deceptive Smile
Mula sa salitang deceptive na nangangahulugang mapanlinlang, ito ang ngiti ng isang taong may masamang intensyon. Kunwari, nakipag-deal ang isang sindikato sa isa pang sindikato at may balak siyang onsehan ito… iyon na ‘yon! Sa pag-ibig ay talamak ang ganitong ngiti dahil hindi natin alam kung ang taong mahal natin ay totoo ang ipinapakitang galaw o kaya mayroon siyang masamang binabalak. Tuso ang ganitong ngiti. Parang ahas na kahit anong oras ay pwedeng umatake at manakit ng kalooban ng iba.
Platinum Smile
Alam natin na ang platinum ay higit pa ang halaga sa ginto. Ito ang ngiti na iilan lang ang nagtataglay. Ang ngiting ito ang pinakamataas. Taglay ng ngiting ito ang pagkakaroon ng pag-asa sa mga wala ng pag-asa; ang ngitng nagiging possible ang imposible; ang ngiting nakakapagbuklod ng mga tao; ang ngiting tumutunaw sa matigas na puso; ang ngiti na walang bahid na pagdududa; ang ngiti ng isang dakilang tao. Dalawa lang ang kilala kong merong ganitong ngiti – si Jesus Christ at ang asawa ko.
Ang bawat ngiti ang sumasalamin sa atin personalidad. Kaya ko ito isinulat ay para balaan kayo sa mga taong ngumungiti sa ‘yo. Ito ay tulad ng isang maskara na pwedeng palitan kahit na ilang beses upang maitago ang kanyang tunay na nararamdaman. Kahit sabihin na ngumiti ka kahit malungkot, ginagawa mo pa din para may maitago ang iyong nararamdaman. Sa bawat ngiti na gagawin mo ay isang pagsisinungaling sa sarili.
Sige, ngumiti ka hanggang gusto mo…
Pero sana maisip mo kung anong ngiti ang gagamitin mo… at kung dapat ba silang ngitian tulad ng ginagawa nila sa ‘yo.
No comments:
Post a Comment