“Walang gulong hindi naaayos sa usapang matino....”
Malamang karamihan sa atin ay napapangibabawan ng galit at poot kapag kausap natin ang isang taong nakagalit natin. Normal lang ito dahil ayon kay Dr. Gregory Fisham, isang psychologist, nangingibabaw ang ating “pride” dahil tayo ay may emosyon. Gusto natin na palagi tayong nakakaangat sa iba. Ayaw natin na matapakan ang atong dangal. Kung gagawin natin itong kasabihang kanto, ayaw natin na mauututan tayo.
Pero naranasan mo na ba ang malunok ng buo ang pride mo?
Sa aking karanasan bilang isang anak, kaibigan, kaklase at kapatid, sinisikap kong maging mapagkumbaba at gawin ang lahat ng aking makakaya upang maayos ang isang hindi pagkakaunawaan. Sino ba ang ayaw ng may kaaway o kasamaan ng loob/ subalit hindi natin maiiwasan na may magalit o mainggit sa atin kahit hindi natin alam ang kanilang rason.
Ano ang dapat mong gaawin upang maging mapagkumbaba?
Una, hindi mo kailangang tabasan ang baba mo kung mahaba. Sa totoo lang, makakatulong ang ang may babang mahaba dahil sinusuportahan nito ang iyong emosyon laban sa galit. Sa pag-aaral ng College of Psychology ng Oxford University sa mga taong may mahahabang baba, mas pasensiyoso sila at hindi mainitin ang ulo. Nagtataka nga ako sa kakatwang obserbasyon nila.
Pangalawa, maging mahinahon. Huwag mong hayaang umakyat ang init sa ulo mo. Matuto kang kontrolin ito dahil para ito sa ikakabuti mo. Mahirap pakisamahan ang taong “hard headed” dahil bingi ito sa kahit anong paliwanag ay opinyon mula sa iba. Napa-practice din naman ito kung gugustuhin mo tulad ng pag-inom ng malamig na inumin o pagsisigarilyo. Pero paalala lang sa mga taong ganito, malapit sila sa sakit sa puso.
At pangatlo, ilagay mo ang sarili mo sa sitwasyon n kausap o kaalitan mo. Huwag kang sakim. Dapat ay maintindihan mo din ang nararamdaman nila. Isa itong mabuting paraan upang magkaroon ng “harmony” o lamig sa tensyong iyong nararamdaman. Bukod pa dito, malalaman ng kausap mo na malawak ang iyong pag-unawa sa mga bagay-bagay sa mundo. Basta ipakita mo ang iyong sinseridad dahil kung hindi ay mababalewala ang lahat.
Sa mga katulad ko na walang kontrol sa galit at emosyon, isa din sa maipapayo ko ang aking sikretong formula – ang F/SC/R = Everything will be fine.
F – Focus sa inyong pinag-uusapang gulo. Iwasang makapagsalita ng masakit at ihilis ang pag-uusapan na maaring makagulo sa usapan.
SC – Stay Calm. Iwasang banggain mo ang init ng kanyang ulo kung sa ‘yo ay mainit din. Lalo lang kayong hindi magkakaunawaan na mauuwi sa bayolenteng reaksiyon at kilos.
R – Relax. Huminga ka ng malalim at gawing komportable ang sarili. Makakatulong ito upang dumaloy ng maayos ang dugo sa iyong katawan.
At ang resulta? “Everything will be fine.” Magkakaroon kayo ng maayos na usapan at pareho kayong magkakaunawaan.
Kung may kaaway ka o kaalitan, ayusin niyo na. Para din ito sa ikakatahimik ng kalooban ninyo. Mas masaya kapag kasundo mo ang lahat. Tandaan mo, “Ang nagmamataas ay pilit na ibinababa at ang nagpapakumbaba ay iniaangat.”
No comments:
Post a Comment